Ma Daidaw Yang Jahtawng Htu Ai Lam

Ma langai ngai shangai daidaw ai shaloi,Chyurum Wunpawng Jinghpaw sha ni yawng,hkan galaw nga ai htunghking lailen langai mi nga ai,Ma shangai daidaw jang,ma mying shamying ai hte"jahtawng htu ai'' ngu ai hpe Chyurum Wungpawng jinghpaw sha ni hta kadai wa shawng galaw hpang ai,ngu ai hpe sagawn yu yang,kadai myitsu salang wa mung,npawt hpe hkrak n chye tsun hkai dan ma ai.



Chyurum Wunpawng Jinghpaw Mungchying sha ni yawng a kaji dwi daju marum rai nga ai Pawng Yawng Wa gaw,Lamu Madai shayi sha Ja Hkawng hpe la wu ai,Shan gaw shadang sha marai kru hpe shaprat mu ai.Dai shadang sha ni gaw,-

Gam : Hkang Gam- Hkang amyu sha ni a kaji
Naw : Rawang Naw- Rawang amyu shan ni a kaji
La : Nung La- Nung amyu sha ni a kaji
Tu : Lamun Tu _ Lamun hte Lisaw amyu sha ni a kaji
Tang: Tangbau Tang- Lawngwaw hte Lachik amyu sha ni a kaji
Yaw : Tingli Yaw ( Jawa Rumja) Jinghpaw amyu sha ni a kaji


Ndai shadang sha ni marai kru hte gaw, langai hte langai masha amyu langai hpra tai wa ma ai hte mying langai hpra,shamying da nga ma ai.Dai mying ni gaw kadai mung tinang ra ai hku shamying la ai mying ni nrai ;kanu yan kawa a shamying da ai mying ni hkrai rai nga ma ai.Dai majaw mying shamying daidaw jahtawng htu ai lam,labau matsun hpe tsun hkai ai myit su salang ni ntsun hkai ma ai rai tim,ma mying shamying ai masat langai ngai gaw,galaw na rai ang ma ai,ngu myit sawn yu ni ai.


Pawng Yawng wa a kasha marai kru hte gaw ,Lamu Madai shayi sha Ja Hkawng a chyu tauba lahkawng hpe jawm chyu nna nga pra wa ai ni rai nga ga ai majaw,lahta e madun da ai amyu kru gaw"Chyurum Wunpawng sha ni" ngu ai mying hpe lu la wa shajang nga sga ai rai.


Pawng Yawng Wa yan Lamu Madai shayi sha Ja Hkawng gaw,ma ni langai a hpang langai daidaw shangai wa ai shani ma jahtaawng htu let,ma ni hpe mying langai hpra,shamying ya dat shajang sai majaw,Anhte Chyurum Wunpawng sha ni yawng dai kasi ningli hkan nna,ma shangai daidaw shagu,ma jahtawng htu ai ngu,dai ni du hkra hkan galaw chye nga ga ai rai.


Dai majaw ma shangai daidaw yang,majahtawng htu ai lam gaw Pawng Yawng Wa yan Lamu madai shayi sha Ja Hkawng aprat kaw nna,hkan galaw hpang wa ai lam hpe dhye sawn lu ai.


Pawng Yawng Wa yan Lamu Madai shayi sha Ja Hkawng a kasha ni hpe Lamu Madai ni gaw,langai hpra hpe shaman chyeju sharung kungdawn mung jaw dat mu ai,Dai sharung kungdaw ni gaw


Hkang Gam hpe Lamai htang bausa,Rawang Naw hpe Kagam hkra ,Nung La hpe Htauman nba,Lamun Tu hte Lisaw ni hpe But ginshang (shr) Shingkyit,Tangbau Tang hpe Magri diseng,Tingli Yaw (Jawa Rumja) hpe ga shaga chye ai Nga,rai nna Lamu Madai ni gaw,shayi kungdaw jaw hpang dat ya mu ai.Dai kasi hkan nna ma shangai daidaw ai nta de sa yang,'Ma hpe hpan ai" ngu nna dai ni du hkra Chyurum Wunpawng sha ni hkan galaw chye nga ga ai rai.


Shing rai byin hpang ai ten gaw B.C 100 ning daram aten hta rai ang nna,dai ni du hkra rai yang shaning 2000 ning jan daram na mat wa sai lam hpe sawn yu lu ai.Ma shangai daidaw ai shaloi ma shadi hpe lahpaw hte atsawm sha majaw makai tawn nna,lasha ma rai yang shadai hpe nta magaw/ninggaw shadaw pawt kaw lup n htawm,numsha ma ni a shadai hpe gaw nta sharem shadaw hta shadaw pawt e atsawm sha lup kau nga ma ai.


Buga ginra nkau mi hta rai yang,shawng shangai ai lasha lat hpe nta magaw daw hpum pawt kaw lup nhtawm,hpang na lsha ni a shadai hpe nta chyahpung maga na sharemdaw pawt kaw lup nga ma ai.Numsha ma ni a shadai hpe gaw,nta shachyang maga de na sharem daw pawt kaw lup chye nga ma ai.Shing rai shadai lup ai lam gaw,buga ginra langai hte langai hta tinang kam sham ai masa hku hkan nna hkan galaw ai lam loi loi shai shajang nga ma ai.


Numsha marai langai ngai ma shangai na nhtoi gu ni wa yang,ma jahtawng htu yang lang na matu,shan hkraw,nga jahkraw,jum hte shanam re ai ni hpe jau jau kawn nna san let mahkawng lajang da ma ai.Ma shangai ni yang lasha rai yang kaning ngu shamying na,numsha rai yang kaning ngu shamying na,ngu nna jau jau kaw nna kraw e sawn da chyalu rai nga ma ai,Ma shangai daidaw dat ai hte rau mying hpe shawng shamying nhtawm,jpang e ma jahtawng hpe htu ma ai.


Dai zawn mying shamying tin ai lam gaw,ma shangai ni yang Nat ni gaw,nta grup grup sa du nga let ma shangai dat jang,mying hkap shamying la na,nga nna sa hkap nga chye ma ai ngu kam let Nat ni rai n shamying rau yang,shawng shamying la na,hpang hkrat jang Nat ni shamying la kau na re,ngu kam ai majaw ma mying shamying na hte ma jahtawng htu na hpe,shana yuptung e mi rai tim,tin shapun galaw chye ai lam rai nga ai.


Ma shangai nna ma hkrap ai nsen na ai hte rau,jau jau kaw nna myit yaw shada sawn lajang da ai mying hpe alawansha,shamying kau nga ma ai.Dai hpang jahkum mazing lajang da ai shan hkraw,nga hkra hte shakau shanam ni hpe la nna,yuptung e rai tim ma jahtawng htu nna,dai yang nga ai masha ni hpe karan jaw let sha chye nga ma ai.Htingbu htingbyen ni hte makyin jinghku ni hpe gaw,hpang jahpawt nhtoi htoi jang she hkan karan jaw nga ma ai.


Ndai ma jahtawng htu ai lam gaw,moi na prat ni hta Nat naw jaw nau nga ai ten hta gaw Nat jaw tim ,n jaw tim kaga maigan amyu ni rai tim,hkan galw nga ai ma shangai daidaw lam rai nga ai majaw,ndai prat hta," Wunpawng Htung Hking " kaba langai mi tai nga sai rai.


Ma shangai dai daw ai hpang ma mying shamying let ma jahtawng htu ai lam hpe kadai myitsu du shalang ni tsun hkai ai labau maumwi hpe mung nna yu ai,Rai tim,ma mying sha mying let ma jahtawng htu ai lam hpe lawu de na hte maren sha mu lu ai.


N dai ma mying shamying ai hte ma jahtawng htu ai lam hte seng nna,1952 ning,April shat hta Janshi jana ga na Duwa Byengwai Wa,Jai Wa Duwa chyinghtawng Zau Naw sadon ga,Duwa Aura Tang,Sadon ga,Salang Lahkek Tu,Wawhkyung ga ndai Du salang ni gaw sadon ga na Duwa Aura Tang a dawdap e,labau maumwi sagawn let jawm hpawng ai hte jawm bawngban ai shaloi,ma shangai daidaw yang ma jahtawng htu ai lam hpe mung tsun sagawn let jawm jahkrup let,ka lajang da ai Zi Zaiwa matsun lanau laika hta mu hti yu lu ai rai.Ndai lanau maumwi tsun hkai ai hta Salang Sumlut Gun Zaw,Luhtawng ga na Salang Yawnghtang Naw,Chyinghtawng Saga Pa,yan mung tsun hkai lawm ai hpe mu chye lu ai.


Ma shangai daidaw yang mying shamying ai hte jahtawng htu ai lam gaw,Nat jaw ai ni rai yang dai shana jang ma jahtawng htu let mying shamying kau ngut sai rai tim,hkristan masha ni gaw ,hpang e mung,ma mying shamying poi ngu nna mung,ma daidaw lekmat la akyu hpyi poi ,ngu nna mung bai naw galaw shajang nga ma ai.


N dai gaw Moi prat kaw nna ndai prat du hkra, Chyurum Wunpawng Mungchying sha ni naw hkan galaw nga ai htunghking lailen kaba langai mi rai nga ai rai.


****Matsing....Wunpawng Htunghking laika Kaw na bai ka bang ai........