Chyurum Wunpawng Sha ni Hta Myihtoi Nga Hpang Wa ai Lam

Moi shawng de na prat ni hta Chyurum Wunpawng Jinghpaw sha ni hta Myihtoi,ngu ai rai n nga ma ai.Dai ten hta hpabaw sha ra tim,Mahtum mahta ni hpang de sa san,sa hpyi rai chye nga ma ai.


Dai zawn re ai ten hta Mahtum mahta ni gaw,'' Ndai shinggyim masha ni gaw,kadai wa hpa baw sha ra tim anhte hpang de sha sa sa rai,shada da grau dum,chye dum ai ni hkrai rai nga ma ai;shada da kam hkat ,shada da hkungga la ra rai nga chye na matu naw sharin ra sai," ngu myit la mu ai.



Shinggyim masha ni hpe sharin na matu,mahtum mahta ni gaw ,grai lasi lamun re ai magwi langai mi jaw dat mu ai.Dai shani kaw nna shinggyim masha ni gaw ,mahtum mahta ni jaw dat ai magwi hpe rem nna nga mu ai.


Shinggyim masha ni gaw Mahtum mahta ni jaw dat ai magwi hpe rem let nga nga ma yang,dai magwi gaw lani mi hta bai si mat wa malu ai.Shaloi shinggyim masha ni gaw,si mat ai magwi kaw na kawng hpe malaw la nhtawm,bai rem da ma ai.Dai magwi kawng yan hta na pai maga kawng lu ai ni gaw,''Bu praw myihtoi,Bu nat shagawn," tai na bai nga manu ai.


Mali hka sinpraw hkran lam hku ninghtawn ga tam let yu hkrat wa ai Chyurum Wunpawng sha ni gaw,dai pai maga na magwi kawng lu ai ni rai nga ma ai,ngu nna dai ni du hkra ,matsun labau ndai tsun hkai ai hte kam shajang nga ma ai.


Hkra maga de na magwi kawng lu ai ni gaw,Myihtoi jahku htoi rawng rawng ma yang, ningju jan jahku pru,gwilawng maitsan jahku tu,yujung hkat lawng jahku hku,Du mung yawng du,Hpraw mung yawng hpru,kadai wa a ga hpe mahtang n chye hkan rai nna masha yawng tinang a myit shadang let gumrawng gumtawng rai nga shajang mu ai.


Dai zawn shinggyim masha ni gumrawng gumtawng rai nna nga shajang ma yang,Mahtum mahta ni gaw,'n dai zawn rai nga gaw n mai sa na re;langai hte langai shada da hkungga lara chye na matu naw lajang ya ra sai,'' ngu nna Mahtum mahta ni hpaji daw let lajang ya mu ai.


Dai hpang Mahtum mahta ni gaw, '' Shinggyim masha ni hta Kinring Kasen hkai yang tu ai ni sha she grau nu ga; Ntawn udi gawut yang Hpunggam Ula goi garu ai wa sha she grau nu ga; Jan hpe mung Jan Yi,Jan la chye karan ginhka ai wa sha she grau nu ga, " ngu nna Shinggyim masha ni hta masat masa kumla karan masat da ya manu ai.


N -dai matsun gahkan nna daini du hkra kadai wa grau mayu,reng mayu Du magam tai mayu tim,n-tsa de na madat ahkang aya lu ai wa chyu sha grau lu ai lam rai nga ai hpe naw kam sham shajang nga ma ai


Dai shani kaw nna Shinggyim masha ni hta Myihtoi ngu ai nga hpang wa sai.Shing rai Chyinglim Myihtoi dat yang gumjawt,Chyingtawn Myihtoi dat yang gumlawt pru wa sai;Dai shani kaw nna jan hpe mung kinding lu manu ai; shata a n'htoi mung dai shani kaw nna htoi pru manu ai; nga nna shinggyim masha ni hta Myihtoi htoi hpang wa masai rai.


Ndai ten hta htoi ai myihtoi ni gaw,moi ma matsun hku hkan nna Myihtoi htoi shajang ai nrai;Myihtoi kaba ni chyu sha moi na matsun ga hkan nna htoi shajang ai hpe chye lu ai.Masha marai langai ngai kaw Nat langai ngai shang nna hpyi lu,hpyi sha mayu nna,Nat shang ai hte dai wa tsun shaga ai ga na ai gaw, " Ndai wa Myihtoi htoi nga ai,' ngu myit la shajang nga ma ai.Dai wa hpe mung ,"Myihtoi htoi nga ai.Nat shang nga ai,'ngu kam shajang nga ma ai.


Myihtoi majing ni gaw hpang de hpa byin wa na ra ai lam hpe ,jau jau kaw nna tau tsun shadum re ai ni mung ma ai.Dai ni gaw Myihtoi kaja,Myihtoi majing ni rai nga ma ai.Lahta de tsun lai wa ai magwi kawng gaw,Myihtoi nia lahkum shatai na matu rai nga malu ai
Ndai zawn Myihtoi htoi ai lam nta myu masum nga ai.
(1) Hpang de hpa byin na ra ai lam hpe tau tsun dan, tau nna htawn shana da ai Myihtoi ga
(2) Ya yang byin nga ai lam ni gaw hpang de kaning rai nna byin shachyaw wa na ra ai lam ni hpe htawn tsun shana da ai Myihtoi ga
(3)Chyewa Ningchyang nan shang nna gaja wa byin wa na ra ai hte hpang de teng wa tau tsun matsun da ai Myihtoi ga ni rai nga ai


Myihtoi nkau mi gaw Nat kaji kajaw shang nna,hpyi lu hpyi sha,hkrup mara nga nna tsun ai hte hpyi sha ai Myihtoi ni hpe," Htoi brawp brawp ai,''nga ma ai.Dai zawn htoi brawp brawp ai ni a ga hpe,myitsu salang ni masat masa madat mara rai nna matsing da ai lam n nga ma ai.


Ndai zawn Myihtoi amyu myu paw pru nga ai majaw,kadai wa gaw htoi brawpbrawp ai kun?
kadai wa gaw myihtoi kaja rai kun? ngu nna chye ginhka na matu,nnan hkoi hpang wa ai masha ni hpe myitsu Du salang ni gaw shawng jep yu,chyam yu,rai nna kam ram ai masha ni a ga hpe sha kam let hkan madat mara nga ma ai.


Myihtoi nnan htoi hpang wa ai masha ni hpe chyam yu yang,shanhte dung na matu san da ai myihtoi lahkum ntsa e,shingbwi ju dan mara tawn,de a ntsa e langu lap hte bai sap nep tawn rai nhtawm myihtoi lahkum hpe san da lajang da ma ai.


Bai nna nat ndaw e galaw tawn ai myihtoi hkinrawng kaw htan da ai lakang hpe mung nhtu hpe lahkawn la n htawm ,lakang n-gam (ninggam) shatai let galaw da ma ai.Masha marai langai ngai myihtoi htoi hpang wa ai shaloi,shingbwi ju lahkum hta dung yang,shingbwi ju nju ai wa,Myihtoi hkinrawng kaw gat lung wa yang ,lagaw hta nhtu hte nrat,hpa n byin ai wa,rai yang she dai wa hpe ,"Ndai wa gaw myihtoi kaja rai sai;Nat kaja shang ai wa rai sai" ngu kam let dai myihtoi wa a ga hpe Du salang ni madat mara hkan sa ya nga ma ai.


Ndai myihtoi ngu ai gaw ,maigan amyu ni hta n nga ai sha,Chyurum Wunpawng Jinghpaw sha ni kaw sha moi prat kaw nna ndai prat du hkra ,nga hkrat wa ai hte kam ging ai myihtoi ni ga hpe kam let madat mara hkan sa chye nga ma ai.N kam ging ai Nat kaji kajaw tsu nat zawn re ai ni shang nna hpyi lu hpyi sha ai myihtoi htoi brawp brawp ni a ga hpe kadai mung madat mara hkan sa ai lam nnga ma ai.


Ndai zawn myihtoi nnan htoi hpang wa ai masha ni hpe shawng jep sagawn ai lam gaw,Nat rai tim nkaja ai ni hpang de n shang u ga,masu sha ,majoi hpyi lu hpyi sha re ai nat ni hte kam mara nga nna htoi ai myihtoi masu ni npaw pru u ga ,ngu nna myitsu salang ni jep sagawn ai lam rai nga ai.


N dai gaw Chyurum Wunpawng Jinghpaw sha ni hta moi prat kaw nna ndai prat du hkra,myihtoi ngu ai nga ai hte dai ni a shadum jahprang ai ga hpe madat mara hkan sa nga ai htung hking kaba langai mi rai nga ai rai


*********Matsing...Wunpawng Htunghking laika kaw na ka bang da ai.................