Dum ga, hprang ga, myit hkrum ga!

By hkyihkang

Anhte yawng kamhpa ai KIO/KIA hte Wunpawng sha ni gaw labau shang dawdan lam hpe galaw sai hte maren, nbung laru ru nga ai hkrun lam de hkawm sa hkyen sai re. Dai gaw jaw ai lam re ngu yawng hkap la ga ai re majaw ya ten gaw anhte Wunpawng sha ni yawng myit n hkrum ai lam ni, myit machyi ai lam ni, nang shoi nang sha nga ai ni, mu mada lam n bung ai lam ni nga yang kabai da na, KIO/KIA hpe madi shadaw garum let, anhte a myit hkrum myit rum lam hpe madun ra ai ten re ngu kam ai.


Myen hpyen asuya a mungdan uphkang hkrang (constitution) ngu ai gaw anhte Wunpawng sha ni hpe sha n-ga laga myusha yawng a shawnglam hte ahkaw ahkang gam maka hpe makawp maka ai lam n nga ai sha n-ga mungchying sha ni prat tup jaw lup nsin hta hkrit gari let, hkrap myi prwi hte sakhkrung na matu lam kaba re nga ai. Ndai mahkam hta n yawng lawm mat na matu sadi ra na re.

      Dai mungdan gawgap uphkang hkrang (constitution) gaw zaibyu ntsa gap da ai, shadaw n ngang ai nta hte bung na, lani mi hten run mat na re. Myen hpyen a ralata poi ngu ai gaw Myen hpyen asuya asak galu na matu, mayam yam jaw na, tingkyeng myit hte amyu hpe nyet kau na, dutsha na masha ni, mung masha ni hpe masu magaw roi rip sha na ahkaw ahkang tam ai jahkyawn ni law law pru wa na ra ai.

Myen hpyen wa gaw Jinghpaw amyu mat mat na matu lam amyu myu hku na ayan shakut taw ai hpe katsi majan hta si hkrum mat ai hpe yu let dum sadi ra sai re. Anhte Wungpawng sha ni shada da sat hkat, nat hkat na matu lam tam nga ai re hpe hpunau Karen (Kayin) ni hpe kasi la ra ai. Galang u kaba hpun ntsa hta dung yu nga ai hpe dum ga.

KIO/KIA zawn kamhpa mai ai hpung n nga yang anhte Wunpawng sha ni jit ji na matu pi Myen hpe ahkang hpyi ra na ra ai hpe dum ga. Maigan du ai hpunau wunpawng sha ni hpe shadum mayu ai gaw ya na zawn mung shawa hte KIO shawnglam de gwi gwi rawt sa wa yang, gara lam hku tatut madi shadaw karum na lam hpe ya ten hta myit hprang ra sai ngu mu mada ai.

Simsa ngwi pyaw shara gaw nga let marawn n-gun madun ai hte sha gaw anhte dangdi lu ai lam ngut sai ngu n sawn la na ahkyak ai. KIO sanghpaw hten run yawng lim mat yang, nang, ngai yawng lawng mat na sha re. Dai gaw myu mat na lam a ningpawt ning hpang re ai hpe dum ra ai. Myen wa gaw anhte a lapran sumprat dawk bang jaw na matu ayan la nga ai re majaw ya ten hta gahkyin gumdin ra ai aten re ngu mu mada ai.

Tinang a tingkyeng akyu matu Myen hpang tsap ai ni hpe labau wa jeyang na zawn, myusha yawng na matu, kashu kasha ban a matu tsap ai ni hpe labau wa shagrau na ra ai. Wunpawng sha ni myit hkrum myit ra, yawng lani mi nhtoi hta wanglu wanglang ahkaw ahkang lu ai, ngwipyaw ai nhtoi de du shang wa na re. Dai re majaw dum ga, hprang ga, myit hkrum ga.