Htai mung na JW sha ni sim sa ai hte Zup Ra Manau nau

 By KNG
Htai asuya ahkang jaw ai hte maren sim sa ai hte, 4 lang na Htai mung nga Jinghpaw Wunpawng sha ni a Zup Ra Manau Poi hpe, Chiang Mai ginwang, Ban Mai Samahki Jinghpaw kahtawng galaw lu sai.

Manai poi hpe, mani hte dai ni, November 26 hte 27, lahkawng ya tup galaw nga ai lam re.

Htai mung, Ban Mai Samahki Jinghpaw kahtawng e Jinghpaw htunghking Zup Ra Manau hpe sim sa ai hte nau nga yang. Sumla: Kachin News Group

Ndai poi de, kahtawng masha ni hte Htai mungdan Chiang Mai, Bangkok mare kaba na JW sha ni hte rau, kaga, Japan, Malaysia, Singapore, Miwa, America hte kanu Jinghpaw mung na poi sa lawm ai masha yawng gaw 1,000 mi jan re lam chye lu ai.

Manau poi galaw ai yaw shada lam hte seng nna kahtawng na Hkalup Hpung Up Sara, Rev. Lashi Tu Nau tsun ai, “Htai Hkawhkam hpe shagrau ai hku mung rai, mungkan shara shagu hta chyam bra nga ai, Jinghpaw myusha ni wa hkrum zup lu na matu, yaw shada let galaw ai re.”

Ban Mai Samahki Jinghpaw kahtawng hpe, lai wa sai, 1982 ning February 5 ya shani hta Htai hkawhkam Bhumibol Adulyadej kawn jaw da ai hte, ya ten kahtawng masha 300 jan shanu nga sai re.

Bai nna, ndai Manau poi de Htai hkawhkam wang na du salang ni mung shanglawm ai lam matut chye lu ai.

Lai wa sai masum lang na Manau poi ni hpe gaw, ‘Sut Manau’ hku galaw wa sai raitim, ding ning gaw, ‘Zup Ra Manau’ hku bai galaw wa ai lam rai nga ai.

Manau shadung hte Manau gawknu ni gawgap na matu Htai hkawhkam wa kawn garum gumhpraw Baht 50,000 jaw wa sai hte, Jinghpaw Wunpawng Amyusha Hpung (KNO) a ningbaw Duwa Bawmwang La Raw kaw na mung Baht 150,000 jaw bang wa sai lam, chye lu ai.

Htai mungdan a pyada ni hte hpyenla ni mung Manau poi garai n hpang shi ai kaw na, shimlam la ya ai lam, sara Tu Nau tsun ai.

Ya na zawn Zup Ra Manau poi hpe 2 ning hta kalang galaw na matu, masing jahkrat tawn da ai lam hpe mung matut chye lu ai.

Laiwa sai 1984 ning February 13 ya hta, tara shang masat ya hkrum sai Ban Mai Samahki mare gaw, shawng ning nan hta, Wunpawng Mungdan Shanglawt Hpyendap (KIA) magam gun ni shawng nga hpang wa sai hte, hpang daw de Jinghpaw myusha ni htawt sit nga wa ai re lam matut chye lu ai.

Mare masha ni gaw, madung kan bau bungli hku gaw hkai lu hkai sha lam rai nna, pru wa ai nam si nam saw hte nam law nam lap ni hpe mung, Htai asuya a matsun madun ya ai hte maren, maigan de dut shabra lu ai lam, kahtawng masha ni tsun ai.

Ndai mare gaw, Myen mung gajarit kaw na, deng 8 jan (Kilometer 13) tsan ai shara kaw nga ai hte, Chiang Mai mungdaw, Chiang Dao ginwang e shanglawm ai re.

JW sha ni gaw, tinang a rudi Jinghpaw mung hta mung up Myen hpyen asuya a lam amyu myu hku pat hkum ai majaw Manau Poi hpe wanglu wanglang  n lu galaw tim, htawt shanu shingbyi nga ai Htai mung e gaw wanglu wanglang galaw lu ai lam re.