Myen gaw NDF Bawk Ja hpe rim na warrant htuk

By KNG

 

Myen hpyen asuya gaw, National Democratic Force (NDF) a Jinghpaw Mungdaw, Hpakan datkasa Slgj. Bawk Ja hpe rim na warrant aming, ndai bat hta htuk dat sai.

Myen ga jarit de Miwa Majan Gasat Dap ni, dap jung sana

By KNG

Shaning law law, Myen-Miwa mungdan lahkawng ga jarit hta, Miwa Gasat Dap, People’s Liberation Army, PLA n tawn sai raitim, ya bai dap jung wa sana re.

Mali Zup hka madim de hkrang ai mawdaw lam, Myen hpaw

 By KNG

Mali-N’mai hka mazup mayan na, mare htawt sit hkrum ai ni nga na matu de da ya ai mare n'nan ‘Myitsone Awng Mye Ta Mare’ hte, Myitkyina kawn Myitsone, Mali-N’mai zup du hkra hkrang ai lam n’nan hpaw poi hpe December 21 ya shani galaw sai re.

MASAT YAN (4) NURSING DIPLOMA JAWNG YU HPAWNG

2010 ning December 20 ya.

Wunpawng Mungdan Shanglawt Hpung (KIO), Ginjaw Hkamja Dap kaw nna lit la woi awn hpaw ai Masat yan (4) Nursing Diploma jawng yu hpawng hpe 2010 ning December 20 ya shani hkying 11:00 Am. aten Laiza Woi Chyai Lawk, Mung Shawa Tsi Rung, Wunjat Gawknu hta galaw wa sai lam chye lu ai.

Myen a shingnang kata na WP myu tsaw ni

  Myen a shingnang kata na WP myu tsaw ni ngu hpa na ga baw dat ai nga yang,anhte WP ni ndum shamyi [srn] dum nga ning len myen a shing nang kata kaw na nkam pru,nlu pru nga ai WP ni law law hpe mu lu ,mu hkrup ai majaw ndai lam hpe myit lu let ga baw dat ai lam rai lit ai.

Shingbut gyi kaput ai majaw, Seng Tawng-Hpapin lapran, lai yak

 By KNG

Lai wa sai bat kru ya, Dec. 18 ya shani, Hpakan Uru Sengmaw ga e Seng Tawng-Hpapin mahkrai, ga shingbut gyi kaput mat ai hte, hka lam mung pat mat ai majaw, buga masha ni hkawm sa yak nga ai re.

Sadung e KIA hte Jarit Sin Dap lapran, ganoi noi gap hkat

 By KNG

Lai wa sai bat pru de, Wunpawng Mungdan Shanglawt Hpyendap (KIA) hte shawng de NDA-K, ya, Myen npu taw ai Jarit Sin Dap lapran, shada da hkrau hkat ai hte, ganoi noi gap hkat wa sai lam chye lu ai.

UK rapdaw rung hta Mungdan daidaw nlu ai amyu sha ni woi galaw ai “decolonization” hpawng hta KNO (UK) ningtau ningbaw shang lawm

 By Kachinland

Westminster-London: Mungdan daidaw nlu shi ai amyu sha uhpung kaw na salang ni gaw mani na UK aten  shana de hkying 6:30 hta Scottish National Party amat langai rai nga ai Mr.Angus Brendan MacNeil kaw nna hkap tau nna Westminster kaw woi galaw ai lam chye lu ai.  Ga baw hku nna "Mungdan masat masa nlu ai amyu ni hpe kadai makawp maga na" ngu ai hpe lakap nna bawng ban mat wa sai. Ndai lamang hta Jinghpaw Wunpawng Amyu Sha Hpung (UK) ningtau lithkam  Salang Lachyung Ring Du kaw nna anhte Jinghpaw Wunpawng Amyu Sha ni a lam hpe tsun sang lang lai wa sai.

Ngang kang ai amyusha shim lam de

Ka Ai: Layang U Ra
Ji woi ji wa ni a prat kaw nna amyusha shim lam (national security) ngu ai hpe, hpyen masa shim lam (military security) ngu ai hte kayau kaya rai nna jai lang lai wa ai lam ni a majaw, amyusha shim lam ngu ai hpe n-tsa lam hku nna “tinang a lamu ga ginra, mungchyingsha hte n-hprang sut rai ni hpe hpyen wa n-madu la kau lu hkra, laknak hpai nna, makawp maga ai lam” ngu nna lachyawm hpaw jai lang lai wa ai lam rai nga ai. (Barry Buzan, New patterns of global security in the twenty-first century, International Affairs, July 1991) Rai tim, laja lana re ai gasat gala lam (major war) ni nnga mat sai, dai ni na mungkan hta gaw, amyusha shim lam ngu ai hpe, hpyen masa shim lam san san hta grau nna kaba dam lada ai hku, lachyum shaleng jai lang nga sai lam hpe mu lu ai. Lam mi hku nna tsun ga nga yang, amyusha ni grin nga lu na lam hpe jahten sharun maw mawn nga ai lam ni yawng hpe, amyusha shim lam a matu dingbai dingna lam ni (threats to national security) ngu nna jai lang nga sai aten rai nga ai. (UNDP, Human Development Report 1994)

Jinghpaw Mungdaw Nhtoi Manau Poi hpe Myen woi ningbaw na

 By KNG

63 ning hpring Jinghpaw Mungdaw Nhtoi, Manau Poi Kaba hpe, Jinghpaw htunghking n chye ai Myen hpyendu kaba langai woi ningbaw na re majaw, htunghking salang ni myit n pyaw nga ai lam, chye lu ai.

Ga jarit hpaga pat ai majaw, Miwa langu hpaga sum machyi

 By KNG

Myen hpyen asuya gaw Wunpawng Mungdan Shanglawt Hpung (KIO) hpe sut masa pat ai hku nna, Jinghpaw mungdaw a madung Miwa ga jarit hpaga pru-shang lam hpe ndai laman pat dat ai majaw, Miwa langu hpaga la ni hpe Yuan wan lam sum machyi shangun sai re.

Htai mung na JW sha ni sim sa ai hte Zup Ra Manau nau

 By KNG
Htai asuya ahkang jaw ai hte maren sim sa ai hte, 4 lang na Htai mung nga Jinghpaw Wunpawng sha ni a Zup Ra Manau Poi hpe, Chiang Mai ginwang, Ban Mai Samahki Jinghpaw kahtawng galaw lu sai.

Manai poi hpe, mani hte dai ni, November 26 hte 27, lahkawng ya tup galaw nga ai lam re.

Htai mung, Ban Mai Samahki Jinghpaw kahtawng e Jinghpaw htunghking Zup Ra Manau hpe sim sa ai hte nau nga yang. Sumla: Kachin News Group

KIO hte ramma ni laksan, Laiza e N’lung N’nan Sha Poi galaw

Wunpawng Mungdan Shanglawt Hpung/Hpyendap (KIO/A) gaw, buga shara shagu na Jinghpaw ramma shayi shadang sha ni hte, laksan N’lung N’nan Sha Poi hpe, KIO/A ginjaw Laiza e galaw lu sai re.

Laisin rung ni dawm na KIO matsun dat

By Naw Din

Ndai bat mali ya, November 25 hpe jahtum tawn let, Myen hpyen asuya uphkang kata, Myitkyina hta lai, ngam ai ginra na KIO laisin rung ni yawng dawm kau na matu, KIO matsun dat sai.

KIO gaw, Laiza daju e ginjaw komiti hpawng hpe lai wa sai bat hpang kru ya, November 20 ya shani galaw nhtawm, ya na zawn laisin (liaison) rung ni dawm kau na matsun dat ai lam re.

Lai wa sai September praw kaw nna, ndai KIO ginjaw Laiza shang chyinghka hta Myen hpyen ni gaw pru-shang masha jep san lam hpe shaja tawn ai re.

Shawng e, Myen hpyen asuya a masha langai gaw, Myitkyina Datkasa Rung Daju (MDD) lithkam Dukaba Ji Nawng hpe, telephone hte “KIO laisin (liaison) ni dawm kau na sadi jaw tsun shana wa sai hte maren”, dai hpe galaw sa wa ai lam, KIO salang ni tsun ai.

Myen a sadi jaw ga hta, lama KIO laisin rung ni hpe tinang nan dawm kau ai lam n galaw yang, shi hku nna ladat amyu myu hte n dawm dawm hkra galaw na masa re lam, matut chye lu ai.

Lai wa sai shata October 18 ya hta sha, Myen gaw KIO a Mu Nyin hte Hupin laisin rung hpe aten kadun sa wang tawn ai lam ni galaw sai re. Ndai hpe, October 13 ya shani, KIA a bawm hkrup nna Mugawng myu ne, Pinbaw mare masha 2 si, langai hkala hkrum ai mabyin hte matut na galaw ai lam re.

N tara ai Ralata Poi re lam, Slgj. Su Chyi hte Komishin de laika tang

By KNG

Galaw ngut sai November 7 Ralata Poi gaw tara rap ra ai hte wanglu wanglang ahkaw ahkang n nga ai hpe, National Democratic Force (NDF) pati a Slg. Ma Hka gaw, Naypyitaw Ralata Poi Komishin hte Democracy ningbaw Slgj. Awng San Su Chyi de laika tang dat sai re.

Ndai laika hpe ‘Ralata Poi Komishin a gawng kya ai lam, Pyi Hkai Hpyu Pati (USDP) a n tara ai hku ralata me zinlum ai lam ni,’ ngu ai gabaw lahkawng shatut na, sa dat ai re lam Slg. Ma Hka tsun ai.

Yangon daju NDF pati a Jinghpaw mungdaw a datkasa lahkawng-- Saranum Bawk Ja hte Slgj. Ma Hka (pai kawn hkra de). Datkasa lahkawng yan me n dang ai. Sumla: Kachin News Group

Seng ang ai, ralata poi komishin ni gaw, me jaw na ni hpe, USDP hpe sha me jaw na matu matsun madun ai lam ni galaw wa sai hte, tau hkrau nna, jau hta da ai me ni hte seng nna mung, ralata poi rit kawp tara ni hte n htan shai nga ai lam, laika hta ka madun tawn ai re.

Majan byin jang, Miwa gaw KIA hpe laknak garum na n re

By KNG

Kumyunit Miwa asuya gaw, lama Myen hte amyu bawsang rawtmalan hpung ni lapran dinghku majan byin wa jang, Wunpawng Mungdan Shanglawt Hpung (KIA) hpe laknak garum jaw na masa n nga ai lam, chye lu ai.

Myen hpyen asuya a jinghku kaba Miwa gaw, shi a Yunnan mungdaw hte jarit ai Sam mung na rawtmalan hpung nkau hpe laknak garum na masa nga tim, Jinghpaw (KIA) hpe gaw garum na n re.

Hpakan e lungseng ga bum kaput nna, masha 50 jan si

November 13, lai wa sai bat hpang masum ya jahpawt hkying 4:30 daram hta, Hpakan ga, Maw Shan, Hkahku kahtawng e lungseng ga bum ru kaput wa nna, masha 50 jan si hkrum sai lam, chye lu ai.

Byin ai gaw, Tit Tunglung company a lungseng htu shara kaw rai nna, pe 200 jan tsaw ai lungseng ga shingbut akajawng ru hkrat wa ai majaw, ndai zawn si hkrung si htan hkrum wa ai re.

Asak kung Jinghpaw nu num lahkawng, roi rip hkrum

By KNG


Jinghpaw mungdaw, Hugawng Pa na asak kung Jinghpaw nu num lahkawng gaw Yuzana company amu galaw masha langai a hkum shan roi rip ai hte adup gayet hkrum sai re.

Ndai mabyin gaw November 13 ya shani byin ai rai nna, nu num langai gaw Wara Zup mare na re ai hte kaga langai gaw Nam Sai mare na re lam, chye lu ai.

Hugawng Pa maling mala hpe jak hte shawt shakrin nhtawm Kumshu hte Nai Kadung sun galaw nga ai, Yuzana company. Sumla: KDNG

Nu num lahkawng hte ni nawn ai ni tsun ai gaw, asak 40 daram re ai hpawmi gaw shinggyim roi rip hkrum nna, kaga asak 60 daram re ai nu num rai yang, ganoi malap hkra adup gayet hkrum ai re, nga ai.

Roi rip hkrum ai nu num lahkawng gaw, ja htu dabang nga ai, Yuzana company sun makau, Ban Kawk mare de gat dut sha nga ai hte, gat dut sa ai lam lapran, nam maling de dai, company masha wa, masu lau la na, ya na zawn roi rip wa sai re lam, dai lam chye ai buga masha ni tsun ai.

“Roi rip ai wa gaw shi dai zawn galaw ngut jang shanhte hpe tsun ai da, ‘ngai gaw 99 (company shara) kaw nga ai re. Ya na zawn byin mat ai hpe, tawng ban ai, ya hpang de bai hkrum ga’ nga tsun na mat mat ai,” nga nna, ndai mabyin hpe chye ai buga masha langai KNG de tsun wa ai.

Amyu bawsang, democracy lam Su Chyi hparan na, Jinghpaw ni myit mada

By KNG


Myen mung democracy ningbaw Slgj. Awng San Su Chyi gaw, mungdan kata democracy gawde lam hte amyu bawsang manghkang ni hpe, rau sha hparan sa wa na matu Jinghpaw ni myit mada nga ai re.

November 13 ya, dum nta rim sharen tawn ai kawn lawt pru wa sai hte, Slgj. Su Chyi gaw, “amyusha mahku mara lam hte democracy gawde lam hpe matut galaw sa wa na re lam” tsun shaga wa sai.

Rim da ai kawn lawt pru ai hte, amyusha mahku mara lam hte democracy lam hpe matut galaw na, mungshawa de hkadahka jaw ai Democracy ningbaw Slgj. Awng San Su Chyi.

Myen-Miwa ga jarit shara mi kaw du nga ai, Matsat-4 (8-8-88) Jinghpaw jawngma ningbaw dingsa Slg. Awng Wa gaw, “Shi lawt wa ai gaw, anhte Myen mung hta democracy lu hkra shamu shamawt lam hta grai manu dan ai re. Bai nna, anhte bawsang amyusha ni hte Myen amyusha ni a lapran bawngban sa wa na lam hta mung, grai lu garum na re,” nga ai.

Ralata poi ngut ai hpang, dai ralata poi hta shanhte hpyen asuya a Pyi HKai Hpyu pati, n tara adang la ai hpang, Su Chyi hpe dat ai raitim, shi lawt wa ai gaw, Myen mungdan ting hta shi a lagaw lahkam ningnan bai lahkam hpang wa lu sai. Bawsang myusha ni yawng a matu mung myit rawt hpa re lam, Myitkyina e daju ai Wunpawng Amyusha Mungbawng Rapdaw (WMR) a komiti malawm Slg. Nsang Tu Awng tsun ai.

Shi bai tsun ai, “Amyu bawsang lam gaw democracy lam re, democracy lam mung amyu bawsang lam re. Democracy lam hte amyu bawsang lam gaw maren sha re majaw, democracy lu yang, amyu bawsang manghkang mung hpara lu na re.”

Myen hpyen gumra 100 ram, Myitkyina kawn Manmaw de lai

BY KNG

 

Myen hpyen gumra 100 ram hpe, hpyen mawdaw 10 ram hte, Myitkyina kawn Manmaw de, November 10, mani bat masum ya shana de htaw mat wa sai lam, chye lu ai.

Hpyen mawdaw kaba langai kaw gumra 10 grupyin htaw tawn let Myitkyina-Manmaw mawdaw lam hku nna, Manmaw de htaw mat ai re lam, mawdaw lam mayan na myi-chyaw-mu buga masha ni tsun ai.