Laisin rung ni dawm na KIO matsun dat

By Naw Din

Ndai bat mali ya, November 25 hpe jahtum tawn let, Myen hpyen asuya uphkang kata, Myitkyina hta lai, ngam ai ginra na KIO laisin rung ni yawng dawm kau na matu, KIO matsun dat sai.

KIO gaw, Laiza daju e ginjaw komiti hpawng hpe lai wa sai bat hpang kru ya, November 20 ya shani galaw nhtawm, ya na zawn laisin (liaison) rung ni dawm kau na matsun dat ai lam re.

Lai wa sai September praw kaw nna, ndai KIO ginjaw Laiza shang chyinghka hta Myen hpyen ni gaw pru-shang masha jep san lam hpe shaja tawn ai re.

Shawng e, Myen hpyen asuya a masha langai gaw, Myitkyina Datkasa Rung Daju (MDD) lithkam Dukaba Ji Nawng hpe, telephone hte “KIO laisin (liaison) ni dawm kau na sadi jaw tsun shana wa sai hte maren”, dai hpe galaw sa wa ai lam, KIO salang ni tsun ai.

Myen a sadi jaw ga hta, lama KIO laisin rung ni hpe tinang nan dawm kau ai lam n galaw yang, shi hku nna ladat amyu myu hte n dawm dawm hkra galaw na masa re lam, matut chye lu ai.

Lai wa sai shata October 18 ya hta sha, Myen gaw KIO a Mu Nyin hte Hupin laisin rung hpe aten kadun sa wang tawn ai lam ni galaw sai re. Ndai hpe, October 13 ya shani, KIA a bawm hkrup nna Mugawng myu ne, Pinbaw mare masha 2 si, langai hkala hkrum ai mabyin hte matut na galaw ai lam re.

Ya na zawn KIO ginjaw matsun du ai hte, dai shani jang, Lahta Sam mung, Muse, Kutkai hte kaga shara na KIO laisin rung ni hpe dawm kau sai lam, KNG sagawn chye lu ai.

Dai re majaw, ya ten, KIO hte seng ai rung masum sha, Jinghpaw mungdaw mare daju Myitkyina e ngam nga sai re. Dai rung masum gaw--- MDD, Buga Company rung hte Buga Myihprap Wan rung ni re.

Lai wa sai 2006 ning kaw nna KIO a Mali Hka myihprap wan hpe Myitkyina e garan jaw hpang wa ai re. Lama KIO Myihprap Wan rung mung dawm kau ra yang gaw, ya Myitkyina hpe wan jaw ai lam mung hkring na masa re lam, KIO ginjaw salang ni tsun ai.

Ya hpang jahtum, KIO laisin rung ni dawm ai hte matut nna, Myen hte KIO lapran, ya jang majan byin na masa gaw n nga ai lam, KIO salang ni tsun ai.

November 7 Ralata Poi a hpang, Myen gaw tsawp galai hpyen asuya n’nan bai hpaw na hkyen nga ai ten, maga mi de, KIO mung, kaga hpu nau rawtmalan hpung ni hte Myen hpe jawm ninghkap let jet ai munghpawm gaw de lu hkra, woi shakut nga ai re.