Ga jarit hpaga pat ai majaw, Miwa langu hpaga sum machyi

 By KNG

Myen hpyen asuya gaw Wunpawng Mungdan Shanglawt Hpung (KIO) hpe sut masa pat ai hku nna, Jinghpaw mungdaw a madung Miwa ga jarit hpaga pru-shang lam hpe ndai laman pat dat ai majaw, Miwa langu hpaga la ni hpe Yuan wan lam sum machyi shangun sai re.


Jinghpaw mungdaw, Daw Hpum Yang Ninghtawn, Shadan Pa e lamu ga eka mun lam shap nna langu sun galaw nga ai, Miwa hpaga la ni gaw, ya ten, Nshung Ta langu si dan an ai aten, langu si n mai htaw la ai majaw, manu mana sum machyi ai lam re.

Ndai Shadan Pa langu si ni hpe madung shalai dut ai gat lawk gaw, Miwa mung kata hte maigan de re lam, chye lu ai.

KIO a ginjaw hte hpaga zup ginra Laiza lam hku nna, ga jarit Myen-Miwa gunrai pru-shang lam hpe, Lajayang Myen gate hta, November 25 jahpawt hkying 6 kawn Myen hpyen asuya pat hkum dat ai re.

Ndai pat hkum ai lam n galaw shi yang, langu si ton 30 jan htaw tawn ai mawdaw kaba 20 daram gaw, shani shagu, Lajayang-Laiza lam hku nna Miwa mung de htaw la nga ai re lam, Laiza na hpaga la ni tsun ai.

KIO a buga gaw sharawt ginra rai wa sai, Shadan Pa e ya ten langu sun eka 40,000 jan nga ai hta, dai kaw amu galaw masha Miwa tsa kaba hte lamu mung na Myen ni hkying kaba nga ai lam, chye lu ai.

Ya na zawn ga jarit hpaga pat dat ai hte rau, ga jarit kawn langu sun de sa ai Miwa amu galaw masha ni hte langu sun mawdaw ni hpe, Lajayang gate hta tsepkawp n shalai sai lam, matut chye lu ai.

Lai wa sai 2008 hta ndai Shadan Pa langu sun hpe galaw hpang wa ai hta, arang law dik bang ai wa gaw, Miwa hpun lauban kaba Lau Ying re. Shi gaw Jinghpaw mungdaw e madung hpaga ai wa rai nna, shi a buga gaw Yunan mungdaw, Yingjang mare re.

Lai wa sai 2003 kawn, Jinghpaw mungdaw e hpun maling ni krin wa nna, ga jarit hpun hpaga bungli ni hkrat yawm wa ai hpang, arang madu Miwa ni gaw, Jinghpaw mungdaw e lamu ga shap nna langu sun ni galaw hpang wa ai rai nga ai.

Lajayang Myen gate gaw KIO Laiza hte madung pru-shang chyinghka rai nna, lai wa sai 1994 Myen-KIO simsa lam la ai hpang, Jinghpaw mungdaw a kaba dik Miwa ga jarit hpaga ginlen chyinghka tai wa ai re.

Miwa gaw, htingbu Myen mung hta hpaga arang Amerikan dollar wan 600,000 jan bang tawn ai majaw, Myen mung kata dinghku majan byin wa nna, dai arang sum mat na myit tsang nga ai mung re.

Ndai ten, lai wa sai bat lahkawng ram hta, Miwa asuya gaw, tinang myusha ni, shimlam sadi maja ra ai Myen ga jarit kata de hpaga bungli n sa galaw na matu, sadi jaw wa sai re.