Jinghpaw Mungdaw Nhtoi Manau Poi hpe Myen woi ningbaw na

 By KNG

63 ning hpring Jinghpaw Mungdaw Nhtoi, Manau Poi Kaba hpe, Jinghpaw htunghking n chye ai Myen hpyendu kaba langai woi ningbaw na re majaw, htunghking salang ni myit n pyaw nga ai lam, chye lu ai.


Mungdaw Nhtoi gaw, du na shata January 10, 2011 hta ang ai rai nna, Manau poi hpe, January 7-11 du hkra, Mungdaw mare daju Myitkyina e galaw na re.

Myen hpyen asuya gaw, Manau Poi Shabyin Shatai Komiti ningbaw shara hpe, Jinghpaw lata na gare la nhtawm, Manau poi hpe shi myit ra galaw na hkyen lajang nga sai lam, komiti salang langai tsun wa ai.

Shawng n'nan lang Jinghpaw Htunghking n chye ai Myen ni woi ningbaw na, 63 ning hpring Jinghpaw Mungdaw Nhtoi Manau Poi a ndau laika hpe, Myitkyina Manau Wang shawng kaw ndai zawn shakap tawn ai. Sumla: Kachin News Group

Komiti ningbaw hku nna, Myen hpyendap a Myitkyina daju Dingdung Daw Daju (Ma-Pa-Hka) a ningtau Dap-up (Du Taimu) Du Up Daju Soe Win hpe, Dap-up (Taimu) Du Up Daju Zeya Awng kawn, ndai December praw 5 ya shani ading tawk galai dang dat ai re.

Taimu Zeya Awng a ading tawk matsun hte maren, mi na Manau Poi Shabyin Shatai Komiti a ningbaw Lahkri La Awng hpe gaw, komiti a amumadu shara hta lit la shangun ai lam, chye lu ai.

Bai nna, Shabyin Shatai Komiti hta shawoi n nga ga ai, “Manau Poi Hpaji Jaw Hpung hte Woi Awn Kongsi,” lahkawng hpe, taimu wa nan bai jat hpaw dat ai lam, matut chye lu ai.

“Anhte a htunghking hpe kachyi mung n chye na ai ni woi awn sana re majaw, htunghking mat wa na hpe pyi tsang ra sai,” nga nna, Myitkyina buga masha langai, shi a mu mada ai lam hpe KNG de tsun shapraw wa ai.

Shawng e galaw wa sai Mungdaw Nhtoi Manau Poi ni hta mung, Myen hpyen asuya gaw lam amyu myu hku, je bat ai hte, ding bai ding na jaw wa sai rai nga ai.

62 lang na Mungdaw Nhtoi Manau Poi hta, Manau shi laika shapraw na ahkang n jaw ai hta n ga, Manau Komiti a shamu shamawt ai lam ni hpe mung, Myen asuya masha ni, yu azi sin nna, azing ayang, Naypyitaw mungdan mare daju de tang madun wa sai re.

Bai nna, dai poi hta Wunpawng Mungdan Shanglawt Hpung (KIO) malawm ni hpe mung, n shanglawm shangun sai re.

Ya galaw wa na Manau Poi hta, hpyen asuya a Pyi Hkai Hpyu Pati (USDP) a rapdaw salang Thein Zaw gaw, Manau poi a matu Kyat sen 500 alu jaw bang ai hte, ya na zawn Manau poi ningbaw shara hpe mung Myen ni bai magra la wa ai re lam, htunghking salang ni tsun ai.

Maga mi de ndai Manau poi a matu ja gumhpraw jaw bang ai Myitkyina buga masha ni gaw, Myen hpyen asuya hku nna Manau poi woi ningbaw na re majaw, shanhte jaw bang kau sai alu ni hpe bai nhtang hpyi la nga sai lam, sagawn chye lu ai.

Bai, Wunpawng Htunghking Hpung Ginjaw mung, Manau Poi Shabyin Shatai Komiti npu, Komiti lakying ni ma hkra hpe dawm kau sana re lam kahtap chye lu ai.

Ndai lang na Manau Poi de KIO masha ni shanglawm na ahkang n jaw ai lam, komiti ningbaw n’nan Soe Win, tsun shaga wa sai lam, chye lu ai.

“KIO ni ndai Manau poi hta n mai shanglawm sai. Manau nau ai lam hpe shawng e gaw mali ya galaw ai raitim, ya gaw, lahkawng ya sha nau sana re,” nga nna, Hpaji Jaw Komiti na salang langai tsun ai.

Bai nna, shawoi gaw, Manau poi hpe lamu ga eka 93 dam ai hku galaw wa sai raitim, ndai lang gaw eka 24 de shagrit galaw na re lam, chye lu ai.