Mali Zup hka madim de hkrang ai mawdaw lam, Myen hpaw

 By KNG

Mali-N’mai hka mazup mayan na, mare htawt sit hkrum ai ni nga na matu de da ya ai mare n'nan ‘Myitsone Awng Mye Ta Mare’ hte, Myitkyina kawn Myitsone, Mali-N’mai zup du hkra hkrang ai lam n’nan hpaw poi hpe December 21 ya shani galaw sai re.


Mare masha gaw, n’nan kaw na, mare htawt sit na matu n ra sharawng ai raitim ya ten hta ningdang lu na ahkaw ahkng n nga mat sai lam Jinghpaw Wunpawng Bawngring Mahkri Shawn Hpung (KDNG) a tsun shaga ahkang lu shayi Ah Nan tsun ai.

Myitkyina dingdung de deng 27, Mali-N'mai zup kaw galaw nga ai, hka madim kaba langai. Sumla; Kachin News Group

“Shanhte kaw hpa lata na n nga ai, mare htawt nga yang htawt sha re,” nga nna, Ah Nan tsun ai.

Ndai hpaw poi lamang de, Myen hpyen asuya gaw, Myitkyina kaw nga ai, kahtawng 28 kaw na mare masha 1,000 jan hpe n sa n mai shanglawm shangun wa sai lam mung Ah Nan tsun ai.

Shi tsun ai gaw, Mali-N’mai zup mayan na mare 60 daram gaw, shara htawt sit ra na rai nna, ndai hka madim masing a majaw, mare masha 15,000 gaw, tinang a dum nta, ginra ni kaw na, atik anang htawt sit hkrum na re nga ai.

Ya ten du hkra n law htum mare 6 gaw htawt sit hkrum sai hte, mare n’nan hta, galaw lu galaw sha na shara, hkau na, hka, hkam ja lam hte hpaji jawng ni a matu, gaw gap da ai lam ni n-nga ai hpe KDNG a ndau laika hta mung madi madun tawn ai.

“Shara n’nan kaw gawgap da ai nta ni gaw, ngang ai lam n-nga ai, lai wa sai bat hta mung, nbung ja ja bung ai majaw, nta nkau galau mat ai,” nga nna, KDNG ndau hta tsun ai.

Burma River Network (BRN) kawn maram tawn ai gaw, Myitsone Mali hka madim masing gaw, US$ 3.6 billion ma na re hte, wan n-gun, hkying hkum mi hta wan 16,634 kilowatt hr (KWH) galaw shapraw lu na re lam tang madun wa sai.

Myen hpyen asuya gaw, wan n-gun hpe Miwa mung de dut shalai na rai nna, laning mi US$ wan 588-597 lu na re lam BRN maram tawn ai re.

“Mare masha ni gaw, shanhte a dum nta, shara, htunghking labau shang shara shamat kau ai hta n-ga, hpyen asuya hte shanhte a rau pawng manang ni awng padang hkam la ai hpe mung, atik anang yu shangun hkrum sai.  Ndai gaw, shawng n’nan hpang wa ai, ndai hka mayan kaw nga ai ni a hpang de byin wa na gam maka hpe madi madun dan ai lam re,” nga Ah Nan tsun ai.

Myen hpyen asuya gaw, Chyihpwi N’mai hka madim hpe mung, ndai December 22 ya hta hpaw poi galaw wa sai hte, ndai hka madim masing gaw, wan n-gun 3,400 MW shapraw na atsam nga ai lam chye lu ai.

Myen hpyen asuya hte Miwa mungdan asuya madu ai, China Power Investment Corporation (CPI) gaw, Mali-N’mai hka mayan hta, hkam madim 7 galaw na masing nga ai hte, lai wa sai 2007 ning kaw, myit hkrum ai hte ndai masing galaw hpang wa ai rai nga ai.