Wunpawng Mungdan Shanglawt Hpung (KIO), Ginjaw Hkamja Dap kaw nna lit la woi awn hpaw ai Masat yan (4) Nursing Diploma jawng yu hpawng hpe 2010 ning December 20 ya shani hkying 11:00 Am. aten Laiza Woi Chyai Lawk, Mung Shawa Tsi Rung, Wunjat Gawknu hta galaw wa sai lam chye lu ai.
Jahpawt hkying 7:30 Am. aten Nursing Diploma jawng ma ni hku nna ga shaka hkam la ai lamang hpe galaw wa sai. Matut nna Hkamja Dap Ningtau Lit Hkam Lat Du Up Jum Nhpang Naw Bu kaw nna Tsi Sara Num/La ni hkan sa mat wa ra ai lam ni hpe Mungga gadun mi hte shatsam mat wa sai.
Shani hkying 11:00 Am. aten hta mung Tsi jawng yu sai Sara Num/La ni hpe Nursing Diploma jawng awng lek mat shagrau ya ai, gup chyawp shachyawp ya ai hte ningtawn kasi kum hpa shagrau ai lam galaw mat wa sai.
Ndai hpawng hta Hkamja Dap, Lit Hkam Du Up Jum N-gan Zau Hkum kaw nna tsi Sara Num/La ni hpe, tinang Ginjaw Hkamja Dap kawn woi awn let, sharin shakyang mat wa ai aten ladaw hta jawng ma ni hpe madang tsaw ai hku sharin mat wa ai, matut nna tsi magam hta ap nawng gun hpai sa wa na Sara Num/La ni hpe mung tinang sharin hkam la da ai hpaji ni hpe, Mungdan hte Amyu sha yawng a matu grau nna akyu rawng, jai lang sa wa ra ai lam hpaji jaw matsun dat sai.
Wunpawng Mundang Shanglawt Hpyen Dap, Dap Awn Daju, Du Daju Gunhtang Gam Shawng kaw nna, KIO a Mung masa yaw shada ai policy hte Nursing Diploma jawng yu Tsi Sara Num/La ni hpe, matut na galaw gun hpai mat wa na magam amu hta tinang Myu hte Mungdan a man e sadi dung ap nawng sa wa lu na matu n’gun jaw hpaji mungga hte shatsam mat wa sai.
Zuphpawng hta Wunpawng Mundan Shanglawt Komiti, Ginjaw Salang rai nga ai, Dap Awn Daju, Du Duju Gunhtang Gam Shawng hte Magam Dap shagu na Ginjaw Komiti Salang ni, Makam Masham Hpung Woi Kanu Kawa ni, Mung Shawa ni, Amyu Shayi Ginjaw Rung Magam gun ni, Mare Buga shara shagu de na Sara Num/La ni a Kanu Kawa yawng hte Ginjaw Hkamja Dap Magam gun kaji kaba yawng shang lawm ai lam chye lu ai.
Shana Hkying 7:00 Pm. aten hta jawng yu sai Sara Num/La ni shang lawm ai yu ngwi pinra hpe mung galaw sa wa sai lam chye lu ai.
Ndai Nursing Diploma Jawng hpe laiwa sai 2009 ning May shata 24 ya shani kaw nna lahkawng ning tup sharin hkam la ai hta jawng ma yawng 145 tup sharin awng la lu sai lam chye lu ai.
Hkamja Dap, Lit Hkam, Du Up Jum N-gan Zau Hkum kaw nna Tsi Sara Num/La ni hpe hpaji jaw mungga matsun nga yang.
Hkamja Dap, Ningtau Lit Hkam, Lat Du Up Jum Nhpang Naw Bu kawn nna Tsi Sara Num/La ni hpe Mungga kadun hte shatsam nga yang.
Ginjaw Salang ni hte Mare Buga de na du sa ai Tsi Sara Num/La ni a Kanu Kawa ni.
Nursing Diploma Jawng yu Sara Num/La ni.
Jawng yu sai Tsi Sara Num/La ni ga shaka hkam la nga yang.
Tsi Jawng yu sai Sara Num/La ni hpe Nursing Diploma jawng awng lek mat shagrau nga yang.
Ningtawn kasi kum hpa shagrau nga yang.
Shana Hkying 7:00 Pm. aten hta jawng yu sai Sara Num/La ni a yu ngwi pinra lamang.
No comments:
Post a Comment
Masha langai ngai a tingkyeng shinggyim ahkaw ahkang hpe hkra machyi shangun ai zawn re ai Gasi ,Ga hkum ni,Kyinsha Lasha re ai Gasi,Ga hkum ni hpe koi gam ga