Myen a shingnang kata na WP myu tsaw ni

  Myen a shingnang kata na WP myu tsaw ni ngu hpa na ga baw dat ai nga yang,anhte WP ni ndum shamyi [srn] dum nga ning len myen a shing nang kata kaw na nkam pru,nlu pru nga ai WP ni law law hpe mu lu ,mu hkrup ai majaw ndai lam hpe myit lu let ga baw dat ai lam rai lit ai.



                  Anhte WP law law wa amyu hpe  tsawra ai ni hkrai rai tim myen ga hpe manu shadan  tsun shaga let arawng la nga ai mu lu ai, tinang WP ni hkrai, rai ai gaw pyi WP n kau myi,  myen ga hpe kabu gara manu shadan arawng la let tsun shaga nga ma ai,myen ga hte n rai yang n chye shaga ai,WP n kau myi nga yang myen ga hte rai yang she n gun ma alu nga ai nga nna pyi tsun chye nga ma ai, yungwi mahkawn myi rai rai, myen mahkawn rai yang she hkraw du,masin su,myit pyaw rai hkam la madat ,hkawn ai ni mung law law nga ga ai.

                  Myen mung dan kata nga nna myen amyu sha ni law law a shingwang kata nga ai ni hpe chyawm gaw nau tsun na lam n nga na re ngu myit lu ai,dai pyi naw myutsaw myit kri dung nna WP ga ,htunghking hpe manu shadan ai kanu kawa ni rai yang kashu kasha ni WP ga sha shaga nga ma ai gaw kabu arawng la hpa rai nga ai.Dai hta ga shadawn tsun ga nga yang ,yu ngwi shadang Mun Awng a kawa gaw "Gala" [English laika sara CDot] amyu rai tim shan nau ni yaw gaw WP myit myit,WP ga shaga rai WP nan rai  nga ai,dai gaw kanu a WP myit,WP amyu hte ga hpe manu shadan ai majaw de akyu rai na re ngu  hkam la ai.[Shanhte kanu hte anhte kadwi ni gaw kanau kana majing rai nga ai.Lasi amyu ]

                  Bai langai myi gaw Rebecca Win hpe yu yu ga , Kawa  myen amyu sha n ga,shi nan mung myen mung dan a mare daju [dingsa]kaw nga kaba wa ai rai tim WP shayi sha yungwi ning hkring hku myen mung hta mying gumhkawng ai gaw shi Kadwi hte Kanu ni a WP myit myit ai majaw,WP ga,htunghking hpe tsawra manu shadan ai majaw rai na re ngu kam ai,shi nan mung jinghpaw ga hpe atsawm sha chye shaga nga ai hpe mu lu ai,[Ngai hte mung hkrum shaga yu ai majaw re,WP nkau myi hta grau chye nga ai hpe mu lu ai]

                  Mabyin langai myi gaw WPZupra kaw malawm rai nga ai WP shayi sha langai a yungwi mahkawn [Myen hku karai shakawn mahkawn]ntsa ngai hku nna mu mada ai lam [wpzupra kaw sha gaw myen mahkawn n bang ga,WP myu lakung ni hta na ngai nchye na ai ga hku mahkawn ai mahkawn rai yang gaw nchye na tim kabu gara ai myit hte madat nga na n ngai] hpe ka da ai dai hpe dai num kasha gaw grai myit n dik n pyaw ai hku nna ngai gaw laika htang wa ai,shi tsun ai gaw america mungdan,shi nga ai shara hta WP ga hte mahkawn hkawn na ahkaw ahkang nlu ai majaw re law,sara kaba e ,nga tsun ai mau hpa kaba langai myi re ngu myit la ai,america mungdan ram shinggyim ahkaw ahkang nga ai mung dan kata WP ga hte Karai hpe mahkawn shakawn na ahkang n nga ai shara mung  she naw a nga nga ai majaw.

                   WP zupra kaw mung zupra daju hte woi awn nga ai zupra Admin ni hku nna ritkawp da rai shadum sadi jaw nga ning len myen mahkawn ,myen sumla hkrung,gasi ni lani hte lani naw law nga ai gaw myen a shingnang shingwang kata na nlu lawt nga ai WP ni rai ga ai ngu  hpe madi madun nga ai,Anhte WP ni wa maigan mungdan kaw pyi du nga ai rai tim myen a shingnang shingwang kaw naw nga mayu ai WP ni law law rai nga ga ai,Myen a shingnang shingwang kaw na lawt na ahkaw ahkang nga nga ninglen n kam lawt rai dai myen ni shingnang shingwang kata na nkam pru rai nga ai gaw maw hpa kaba rai na n hten.

                     Webs hkridun law law hta mung kachin,Kachin boy,kachin girl ,WP mying ni hte rai  nna, ga baw  law law jaw da rai mahkawn ,sumla hkrung ni hpe mu lu ai,shi rai anhte WP ni rai nga ai ngu kabu kara myit hte hpaw dat yu yang law law lang,law law wa grai myit npyaw yawn hpa byin byin rai nga ai,tinang gaw WP ni rai nga ma ai ngu yang Myen ga hte n gun myi alu nga shaga bang da,myen mahkawn hpe myit masin hta grai myit pyaw hkam sha let mahkawn hkawn taw re ai lam ni hpe mu dat,na la rai yang grai myit npyaw ,myit ndik ai lam hkam sha ai, n hpaw yu yang pyi rai sana wa nga myit malai lu ai lam byin pru ai.

                     Shingrai lahta na lam ni byin pru rai tim dai WP ni yawng hpe myu tsaw myit n rawng ai,WP ga,amyu a lai ka,Htunghking hpe manu nchye shadan ai ni ngu nna gaw n tsun mayu n ngai,yawng gaw myu hpe tsawra ,manu shadan let WP myu sha ni hpe mungkan amyu baw hpan law law ni hta mying gumhkaw kalu kaba shangun mayu ai ni hkrai rai nga  ga ai ngu hkam la n ngai,Dai majaw amyu hpe tsaw ra,kalu kaba shangun mayu yang anhte WP ni yawng gaw tinang a ga,htunghking hpe manu shadan arawng la let tinang du hkawm, du nga ai shara,mungdan ni hta manu shadan tsun shaga jai lang nga ga ngu ga saw mayu nngai,myen a shingnang shingwang kata kaw na mai byin ai ladat amyu myu hte lawt kawt lu ai amyu sha ni tai shaga ngu saw lajin dat n ngai rai