Nang shawng n gap yang, ngai n gap: KIO James Lum Dau

By KNG

Myen hpyendap hte Wunpawng Mungdan Shanglawt Hpung (KIO) a lapran, hpyen masa shajat hkat lam tsaw nga ten, KIO shawng Myen hpe gasat hpang na n re lam chye lu ai.

Htai mungdan Bangkok e nga ai KIO Maigan Matut Mahkai, ningtau lithkam Dukaba James Lum Dau KNG hpe tsun ai gaw, majan byin na n byin na gaw, Myen hpyen asuya a lata kaw re lam tsun wa ai.

KIO N/T Maigan Matut Mahkai Lithkam Dukaba James Lum Dau

“Gap hkat ai lam byin na n byin na ngu ai gaw, shanhte (Myen asuya) a galaw tawn chyalu plan (masing) hta she hkan na re.  Anhte maga hku na tak na yak ai,” nga nna Dukaba Lum Dau tsun ai.

Myen gaw, shanhte hpe madung madi shadaw nga ai, Miwa asuya kawn Myen mungdan kata hta mung masa n simsa na, dinghku majan byin na n ra ai majaw, shanhte hku na majan hpaw hpang na matu yak nga ai lam mung, Dukaba Lum Dau tsun wa sai.

Ndai December praw 4 hta, KIA dap 16 hte Myen hpyenla ni a lapran, sadi jaw, sinat kapaw hkat ai lam ni, KIO uphkang ginra, Mai Ja Yang makau e byin wa sai re.

Myen gaw, November htum hte December praw hta, laknak kaba, tank hte hpyen n-gun n’nan ni hpe, Mandalay kawn Jinghpaw mungdaw, Manmaw de sanghpaw hku ginlen bang wa ai majaw, Myen-KIO lapran majan byin wa na buga masha ni myit tsang nga sai rai nga ai.

“Laknak kaba ni Manmaw kaw, Myitkyina kaw htaw bang wa ai hte, hpyenla n-gun grau jat bang wa ai gaw, anhte hpe jahkrit ai lam mai byin ai. Anhte hkrit nna jau jau asum hkam kau na matu yaw shada ai rai na re,” nga, Myen ni a hpyen n-gun shachyip wa ai hte seng nna, shi a ningmu hpe Dukaba Lum Dau tsun ai.

Majan byin wa na hte seng nna, ya ten atsawm hkrat n tsun lu shi ai raitim, KIO uphkang npu shara ni kaw nga ai, Jinghpaw hte kaga myusha ni gaw, majan a matu tau hkrau hkyen lajang ai lam ni galaw nga sai hpe, Manmaw buga masha langai kawn tsun ai.

Raitim, Manmaw buga salang langai gaw, “Anhte Jinghpaw Wunpawng ni nga ai bum ga hkan gaw, ya ten dan la lu ai mam ni hpe hprawng na, yen na rai jang lang na matu, nam hkan makoi tawn da sai,” nga ai.

Shi matut nna, KIA Dap Ba 3 nga ai, Manmaw ginwang na, Manje, N’mawk mare lahta hte, Nam Lim Pa, Mung Hkawng, Mung Ding Pa mare hkan na, mare masha ni mung, hpyen hprawng hprawng jang na matu, malu masha ni hte, ra kadawn ai lam ni hpe tau hkrau hkyen lajang da nga sai lam tsun ai.

Lai wa sai bat hta gaw, Lahta Sam mung, Lashu daju Sinpraw Dingdung Daw Daju (Ya Ma Hka), taimu Brig-Gen Kyaw Zaw gaw, Munggu, Hpawng daju N’gawn hpyen ni hte hkrum shaga let, majan a matu jin jin rai nga na matu tsun shadut wa sai lam, buga salang langai tsun ai.

Bai nna shi gaw, N’gawn hpyen ni hpe, Sam mung Loikang daju KIA dap kaba 4 hte Jinghpaw mungdaw na KIA dap ni a matut mahkai lam hpe, yu sin na matu mung matsun wa sai lam dai buga masha wa tsun ai.

KIO a shi shawng n gap yang, tinang n gap na polisi hte seng nna, lahta na Munggu buga salang wa, ning nga tsun ai, “Anhte a dum nta, anhte a nhku kata kaw du shang nga sai hpyen wa hpe mi, shi n kasat yang, ngai n kasat ai ngu ai KIO a mu (policy) hpe gaw nau n manu mat sai ngu mu mada ai.”

Jinghpaw Wunpawng Amyusha Hpung (KNO) na Salang Z. Di La kawn mung, ning nga tsun ai, “Anhte hku na gaw, mungdan lu taw sai, mung up asuya langai hte langai a ganawn mazum ai hkrang hku n re ai sha, amyusha rawt malan hpung langai hku na galaw na, shaga na hkrang hku mahtang she grau manu na re.”

Makau grupyin mungdan ni hte mungkan a tara ni hpe tau taw na mung n mai nga sai hte myu sha ni grau machyi jam jau hkrum ai lam sha nga wa ai majaw, gwi gwi daw dan ra sai lam shi matut tsun ai.

Lai wa sai, November shata 5 ya shani, Htai-Myen ga jarit kaw, hpaw hpang tawn ai, bawsang myusha laknak lang hpung ni a Daphpawm Hpyendap (Federal Army) a ningbaw mung rai nga ai KIO gaw, tinang maga shawng majan hpaw na matu yak ai lam tsun wa sai.

“Anhte shawng kasat wa na hpe shanhte ra sharawng ai, dai shaloi she shanhte gaw, tawng-chyan-tu, ta-bung ni (gumlau hpung ni) kasat wa ai majaw tinang hkum makawp maga ai hku na anhte mung bai kasat ai re nga dai hku myit tawn chyalu re,” nga nna, Dukaba Lum Dau ningmu tsun ai.

Shi matut tsun ai hta, Myen hpyen asuya hku nna, bawsang myusha laknak lang hpung ni hpe kasat mat na masing nga ai raitim, dang na matu mai byin yang matut manoi kasat mat wa na hte n dang mai jang gaw, asuya langai hku na, simsa lam a matu ngu, gabaw shatut, simsa lam bai galaw shakut wa na masa nga ai re, nga ai.