Sadung e KIA hte Jarit Sin Dap lapran, ganoi noi gap hkat

 By KNG

Lai wa sai bat pru de, Wunpawng Mungdan Shanglawt Hpyendap (KIA) hte shawng de NDA-K, ya, Myen npu taw ai Jarit Sin Dap lapran, shada da hkrau hkat ai hte, ganoi noi gap hkat wa sai lam chye lu ai.


Myen hpyendap, Jarit Sin Dap hte KIA ni gayau gaya nga ai, Waimaw Ginwang, Sadung ginra Lahpai hta, Myen gaw ginra chye ai NDA-K Jarit Sin Dap ni hpe lam woi shangun nhtawm, KIA shara de shani shang wa ai majaw, ganoi noi gap hkat wa ai re lam, buga masha ni tsun ai.

KIA hpyenla (pai) hte NDA-K Jarit Sin Dap hpyenla (hkra). Sumla: Kachin News Group

Jarit sin hpyenla ni hta nkau gaw chyauman masha ni re majaw, KIA a bawm hkam ai shara chye ai majaw, dai hpe koi nna shanhte KIA shara de shani shang wa ai shaloi, shada da hkrau hkat ai lam ni byin wa ai re lam, Sadung buga masha ni tsun ai.

Ndai mabyin ten, Myen hpyendap gaw, Jarit Sin Dap hpyenla ni hpe shanhte a, Ban-du-la Dazik hte Ndan Pala kap ai hpyen uniform raw kau nhtawm, Myen hpyenla hking galai hpun na matsun ai raitim, Jarit Sin Dap ni n hkap la ai lam, sagawn chye lu ai.

Ya ten, Sadung e Myen hte Jarit Sin Dap ni pawng nna hpyen masa shamu shamawt nga ai hta, jarit sin hpyenla 10 hta Myen hpyenla 5 lawm nna, jasin sin hpyenla 20 rai yang Myen marai 10 hkan nang ai lam, sagawn chye lu ai.