Shinggan du Jinghpaw jawngma ni, Ralata Poi ninghkap na ndau

By KNG

Maigan du Jinghpaw Wunpawng Jawngma hte Ramma Hpung (AKSYU) kawn, 2010 Ralata Poi hpe yawng ninghkap na matu ndau laika shapraw dat ai hte, ndai ralata poi gaw, mungshawa masha ni a matu hpa akyu n nga ai lam tsun ai.

“Ndai 2010 Ralata Poi hte Myen hpyen asuya gaw, bawsang myusha ni yawng hte Myen mungmasha ni hpe grau zingri sana re,” nga nna, ndau laika hta AKSYU kawn tsun da ai.

Jawngma hpung ni tsun ai gaw, du na ralata poi gaw, Myen hpyen asuya kawn, hpyen palawng raw kau nna, tara shang mung up asuya byin tai na matu galaw ai re lam hte, mungmasha ni a matu hpa akyu n nga ai lam tsun ai. Bai nna, Mungkan Wunpawng Hpung hte mungdan ni kawn, tara rap ra ai, ralata poi byin tai wa na matu tsun shakut nga ai lam gaw, byin wa na n re lam tsun ai.

“Myen hpyen asuya a lata hta gaw galoi mung tara rap ra ai lam byin wa na n re,” nga nna, AKSYU a ninggawn amu madu Naw Hkam tsun ai.

Jawngma hpung kawn matut tsun da ai gaw, Panglung ga sadi hte maren Myen mung shanglawt ningbaw Gen. Awng San hte bawsang myusha ningbaw yawng ga sadi la da ai, yawng maren mara mungmasa ahkaw ahkang gaw, dai ni du hkra n byin wa ai sha, dinghku majan she byin wa sai re nga ai.

Jawngma amu madu tsun ai gaw, Myen hpyen asuya kawn, shanhte dang na matu atsawm sha hkyen lajang ngut sai hte, mungmasa pati ni mung, shanhte matsun ai hku sha hkan galaw ra na re nga ai.

“Shanhte dang na hku yawng galaw da sai, rap ra ai lam mai byin na n re,” nga Naw Hkam tsun ai.

Myen hpyen asuya gaw, Pyi Hkai Hpyu Pati (USDP) hpe ralata poi shang na matu, Pyi Htawng Su Chyan Hkai Ye Nit Hpwi Hpyu Ye Atin (USDA) kawn mying gale hpaw da nna, USDP a ningbaw ni yawng mung, Myen hpyendap a dukaba ni hkrai rai nga ai.

USDP a ningbaw nan mung, Myen mung hkringmang daju Gen Ting Tsing rai nga ai. Myen hpyen asuya Ralata Poi Komishin (UEC) kaw na mung, shanhte n ra sharawng ai pati ni hpe tara shang pati hpaw na ahkang n jaw ai rai nga ai.

Wunpawng Mungdan Shanglawt Hpung/Hpyendap (KIO/A) kaw na mung, simsa ai ladat hte mungmasa manghkang hpe hparan shakut wa sai raitim Myen hpyen asuya kawn gaw, shanhte npu taw ai, jarit sin dap (BGF) de mahtang hpyen hkrang gale na matu tsun shakut wa ai majaw, grau manghkang shajat ai re lam, jawngma hpung kawn tsun ai.

KIO/A kaw na mung, tinang hpung kaw na magam gun dingsa ni hte, mungmasha ni woi awn ai pati hte myit mada wa sai raitim, Myen hpyen asuya kawn n hkap la ai sha, ningdang kau ya ai majaw, simsa ai ladat hte mungmasa hparan na matu grau yak wa ai re nga ai.

Jinghpaw pati hta kaba dik hte KIO ningbaw malai dingsa no.2 Dr. Manam Tu Ja woi awn ai, Jinghpaw Mungdaw Rawtjat Pati (KSPP) gaw, UEC kawn pati n masat ya ai majaw hpang jahtum pati hpe dawm kau ai rai nga ai.

Myen hpyen asuya a USDP gaw, shanhte npu taw ai, Jinghpaw pati Unity and Democracy Party of Kachin State (UDPKS) hpe hpaw shangun nna, gumhpraw hte rau, kaga lam ni law law garum madi shadaw nga ai rai nga ai.

“Anhte yawng hpe tsun mayu ai gaw, ralata poi hpe ninghkap ai hta lai nna, kaga lam n nga sai ngu ai re,” nga nna, ndau laika shabra ai a yaw shada lam hpe Naw Hkam sanglang dan sai.