Rawtmalan hpung kru ningbaw ni, Myen-Htai ga jarit e zuphpawng galaw

By KNG

Myen mung rawtmalan hpung kru a ningbaw ni gaw, Myen-Htai ga jarit shara mi e, mani din, bat hpang lahkawng ya shani, galaw hpang wa ai lam chye lu ai.

Ndai zuphpawng gaw, Myen hpyen asuya hte n htan shai ai “myit rum rawtmalan hpung kru” a zuphpawng rai nna, uhpung ningbaw ni shanglawm ai lam chye lu ai.
Zuphpawng hpe ndai bat hpang manga ya, November praw 5 ya du hkra galaw na re.

Uhpung kru hta, Karen National Union (KNU), Karenni National Progressive Party (KNPP), New Mon State Party (NMSP), Kachin Independence Organization (KIO), United Wa State Army (UWSA) hte Chin National Front (CNF) ni shanglawm ai.


Dai uhpung ni hta, KNU, KNPP hte CNF ni gaw Myen hte gap hkat nga ai uhpung ni rai nna, ngam ai uhpung masum gaw Myen hte simsa lam la da ai re.

Ndai uhpung a datkasa ni lai wa sai shata hta Amerikan asuya salang ni hte hkrum shaga ngut ai hpang, ya na zuphpawng hpe galaw ai rai nga ai.

Lai wa sai September shata hta mung, ndai myit rum hpung a datkasa ni, Htai ga jarit shara mi kaw hkrum bawngban ai lam galaw sai.

Ya galaw ai zuphpawng hta hpa baw gabaw hpe madung dat bawngban ai lam gaw hkrak n chye lu shi ai re.

Raitim, Myen gaw November praw 7, du na Laban ya shani ralata poi galaw nna, shi bai asuya tai let, amyusha rawtmalan hpung ni yawng hpe gasat shamyit masa nga ai re.

Dai re majaw, tinang hta hpyen n-gun grau kaba ai Myen hpe jawm ninghkap let, Myen mung hpe jet ai Munghpawm Mungdan gaw na hpe rawtmalan hpung ni ra sharawng nga ai re.