Lai wa sai bat kru ya, Dec. 18 ya shani, Hpakan Uru Sengmaw ga e Seng Tawng-Hpapin mahkrai, ga shingbut gyi kaput mat ai hte, hka lam mung pat mat ai majaw, buga masha ni hkawm sa yak nga ai re.
Lungseng company 7 Star kaw na htu kanaw sum pum da ai, ga shingbut ni gaw, Uru Hka de ru bang wa nna, mahkrai kaw ga kaput mat ai majaw, hkawm sa hkawm wa yak mat ai lam re.
Uru Hka makau e sum pum tawn ai hpe mu lu ai lungseng ga shingbut bum. Sumla: Kachin News Group
“Mahkrai gaw ga kaput ai majaw, n mai lai mat ai. Dai majaw, mare ding sa hku na, kawai na she hkawm sa ra ai. Hka ndai hkran, waw ra hkran rap na matu hkying hkum chyen daram na ai. Shawoi hka n du ai shara hkan mung hka du wa ai,” nga, buga masha langai tsun ai.
Ndai ga shingbut bum hpe sit kau let hka lam bai baw na matu, company kaw na backhoe ga htu jak 40, amu galaw nga ai lam buga masha ni tsun ai.
Hpakan e lungseng ga shingbut bum gyin ai lam ni jahkring hkring byin nga ai hte, masha si, hkala hkrum ai ni mung law law, matut manoi byin nga ai re.
Hka lam pat mat ai majaw mung, shawoi hka n du ga ai Yuma mare, Hpakan mare kata hkan mung hka gau ngwi ngwi lung wa ai lam chye lu ai.
Lama na, hka lam pat tawn ai ga bum hpe bat mi laman n lu la kau yang gaw, mare kata de hka shang wa sana re lam, buga masha ni kawn matut sagawn chye lu ai.
Dai zawn sha, maran htu ai lam n nga tim, lai wa sai December 16 ya shani hta sha, Hpakan, Maw Mung mare kaw na Uru hka lam kaw, ga shingbut gyi kapat ai lam byin wa sai re.
No comments:
Post a Comment
Masha langai ngai a tingkyeng shinggyim ahkaw ahkang hpe hkra machyi shangun ai zawn re ai Gasi ,Ga hkum ni,Kyinsha Lasha re ai Gasi,Ga hkum ni hpe koi gam ga