Miwa ball pen hpan mi, Myitkyina e grai dut kaja

Myen mung Ralata Poi du na mahka, Miwa ball pen hpan mi, Jinghpaw mungdaw mare daju, Myitkyina e grai dut kaja nga ai lam, chye lu ai.

Tsi achyang, ndai Miwa ball pen ni hpe hpyen asuya a shingnan pati USDP ni, madung lak lak lai lai mari la wa ai gaw, ndai bat pru kaw na re lam, dai pati hte ni kahtep ai ni tsun ai.

Myen a shingnan pati Duwa Hkyet Hting Nan woi awn ai UDPKS pati. Myen gaw, shi a USDP snr UDPKS, langai ngai hpe sha madi shadaw me jaw na matu, asuya magam gun ni hpe matsun tawn ai. Sumla: Kachin News Group

Lak lai ai hku nna dai ball pen hte ka ai laika hpe aloi sha bai shaprai kau mai ai majaw, hpawt ni galaw na ralata poi hta, ninghkap me snr n sawn me snr pe me ni hpe USDP a madi shadaw me hku, gale la na matu, hkyen ai lam re nga, dai lam hpe lek ai buga masha langai tsun ai.


Lai wa sai, 2008 ning na mungdan gawda tara n’nan shagrin ai shawa ara hkam la poi ten mung, ninghkap me (chyinghkai) ni hpe, madi shadaw me (jaw masat) byin hkra, hpyen asuya galaw la wa sai re.

Mani kaw nna mung, Jinghpaw mungdaw shara shagu hta, USDP gaw, tau hkrau nna, asuya magam gun ni, asak kaba sai mungmasha ni kawn, atik anang madi shadaw me ni, hta la kau sai re.

Manmaw ginwang N’mawk kaw na, asuya pyada du langai tsun ai gaw, shi mung mani sha, ntsa na madi shadaw me jaw na matsun tawn ai, pati lahkawng hta na gara pati hpe mung n lata ai sha, me pa e shi lata masat sha htu nna jaw dat sai lam, tsun ai.

Pyada wa tsun ai hte maren, hpyen asuya gaw USDP snr ndai pati a shanhte pati Duwa Hkyet Hting Nan woi awn ai, Unity and Democracy Party of Kachin State (UDPKS snr Tsa-Da-Ka), langai langai hpe sha, madi shadaw me jaw na matsun tawn ai re, nga ai.

Jet ai democracy masa hte n htan shai nna galaw ai, ndai Myen a ralata poi gaw shaning 20 ning hta kalang galaw ai lam re.

Raitim, Jinghpaw me jaw shawa ni gaw, ralata poi hta gara kadai hpe gara hku me jaw na machye machyang mung n nga ai zawn, myit mung n lawm nga ma ai lam, KNG sagawn chye lu ai.

Ndai zawn byin ai lam langai gaw, hpyen asuya Ralata Poi Komishin gaw, gara Jinghpaw pati, dinghkrai datkasa hpe mung, ralata hkam na ahkang n jaw ai majaw re.