By KNG
Daini galaw ai Myen hpyen asuya woi awn ai ralata poi hta, n hkru ai ladat hte, madi shadaw me galaw la ai lam ni, Jinghpaw mungdaw shara shagu e galaw wa sai re.
Lawnghkang gaiwang na, ralata me dum 87 kaw hpyen asuya a shingnan pati, USDP malawm Slgj. Thin Thin Nywe gaw, me dum ni de sa nna, ralata me bang ai ni hpe, gara hku bang na, gara kaw bang na ngu ai ladat ni, shi kam ai hku sharin ya nga ai lam, myi chyaw mu buga masha ni tsun ai.
Lawnghkang gaiwang na, ralata me dum 87 kaw hpyen asuya a shingnan pati, USDP malawm Slgj. Thin Thin Nywe gaw, me dum ni de sa nna, ralata me bang ai ni hpe, gara hku bang na, gara kaw bang na ngu ai ladat ni, shi kam ai hku sharin ya nga ai lam, myi chyaw mu buga masha ni tsun ai.
Ndai zawn shi kam ai hku galaw nga ai hpe, seng ang ai ralata poi komishin rung daju de shawk shawn ai lam galaw wa sai raitim, hpa ahkyak n lu la ya ai lam, buga masha ni tsun ai.
“Jahpawt maga de kalang sa wa ai, shanhte (USDP) ni dang ai masha ni hpe gara hku me bang gara kaw bang u, nga na yawng sharin ya ai, dai hpang, shani ka-ang maga de kalang bai sa wa na, me laika pa 50 hpe la na, dai ni yawng hpe shi sha mahkret na bang kau ai,” nga nna myi chyaw mu buga masha langai tsun ai.
Dai zawn sha, USDP malawm Slg. Htun Aung Kyaw mung, me dum kaw na me pa 50 jan la mat wa na, shi nan me mahkret kau da ya ai lam, kaga mare masha langai tsun ai.
Ya na zawn, USDP kawn n tara ai hku kam mara galaw taw ai hpe, matsing da ya na matu, National Democratic Force (NDF) pati a Hpakan ginwang datkasa Slgj. Bawk Ja kawn, Hpakan ginwang komishin rung kaw na Dr. Thein Han hpe shawk da ai lam Slgj. Bawk Ja tsun ai.
Hpakan ginwang kaw, me dum 101 nga ai rai nna, bungli galaw masha 1,000 nga ai company langai hpra hta, me dum 17 tawn da ya ai lam chye lu ai.
Me dum 93 nga ai, Gwi Hka mare kaw na, Myanmar Tagawng Company hpe mung USDP hpe me n bang n mai ngu matsun da ai majaw, company madu nan, USDP hpe me jaw kau ra ai lam chye lu ai.
Bai, Myitkyina mare, Du Kahtawng, Shwe Set, Tida hte Dapkawng kahtawng hkan na me dum ni hta mung, USDP dazik lawm ai, palawng hte gupchyawp bu hpun da ai, masha ni mahkawng nga ai hpe mu lu ai lam buga masha ni tsun ai.
Manmaw ginwang kaw me dum 54 nga ai hta me dum 6 kaw gaw, USDP a kanau pati Unity and Democracy Party of Kachin State (UDPKS) gaw, tsepkawp dang nga ai lam, pati datkasa hte yungwi ninghkring Hpaula Gam Hpang tsun ai.
No comments:
Post a Comment
Masha langai ngai a tingkyeng shinggyim ahkaw ahkang hpe hkra machyi shangun ai zawn re ai Gasi ,Ga hkum ni,Kyinsha Lasha re ai Gasi,Ga hkum ni hpe koi gam ga